ლონდონის “ტოტენჰემის” მთავარმა მწვრთნელმა, ჰარი რედნაპმა განაცხადა, რომ ვეტერანი ინგლისელი ფეხბურთელი, დევიდ ბექჰემი მის გუნდში არ ითამაშებს. ამის მიზეზი ისაა, რომ “დეზები” ლოს ანჯელეს “გელექსის” ვერ მოელაპარაკნენ ფეხბურთელის არენდაზე. როგორც ცნობილია, გასული საკლუბო სეზონის მიწურულს, “მილანში” თამაშის დროს, ბექჰემმა მძიმე ტრავმა მიიღო და მას შემდეგ ამერიკელები მისი განათხოვრებისგან თავს იკავებენ.
მიუხედავად იმისა, რომ კლუბები საიჯარო ხელშეკრულებაზე ვერ შეთანხმდნენ, ცნობილია, რომ უახლოესი ერთი თვის განმავლობაში ბექჰემი ლონდონელებთან ერთად ივარჯიშებს და ასე შეეცდება ფორმის შენარჩუნებას.
“მოხარულნი ვიქნებით, თუ ბექჰემი ჩვენთან ერთად ერთი თვის, ან უფრო დიდი დროის განმავლობაში ივარჯიშებს. თუ მართლაც ასე მოხდა, ეს იქნება კარგი მაგალითი ჩემი ფეხბურთელებისთვის, რადგან ბექჰემს გამარჯვებულის ფსიქოლოგია აქვს. დევიდს სიამოვნებით დავიტოვებდით უფრო დიდი ხნით, მაგრამ ამერიკელებს მისი თებერვლის დასაწყისში დაბრუნება სურთ” – ციტირებს რედნაპის სიტყვებს Sky Sports.
რედნაპის განცხადებიდან არ იყო გასული დიდი დრო, როდესაც “ტოტენჰემის” ოფიციალურ ვებ-გვერდზე გამოქვეყნდა ცნობა, რომლის თანახმადაც ბექჰემი ლონდონელებთან ერთად 10 თებერვლამდე ივარჯიშებს. ამ ფაქტთან დაკავშირებით კომენტარი თავად ფეხბურთელმაც გააკეთა: “დიდ მადლობას ვუხდი “ტოტენჰემსა” და რედნაპს. მათ მე ფორმის შენარჩუნების საშუალება მომცეს”.